ភ្នំពេញ៖ រាជរដ្ឋាភិបាលកម្ពុជា បានចេញអនុក្រឹត្យស្តីពីការបង្កើតគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ ហៅកាត់ថា គ.ស.ព.ស. ដែលជាសេនាធិការរបស់រាជរដ្ឋាភិបាលសម្រាប់កិច្ចការព័ត៌មាន និងសាធារណមតិ ដើម្បីការពារសមិទ្ធផល ស្នាដៃ និងកេរិ៍តឈ្មោះរបស់កម្ពុជា។

គ.ស.ព.ស. មានភារកិច្ច ធ្វើកិច្ចការលើការងារពង្រឹងសាធារណមតិ តាមរយៈការតាមដានក្តាប់គ្រប់ស្ថានការណ៍ ឃោសនា ពន្យល់ និងការពាររូបភាពវិជ្ជមានរបស់កម្ពុជា ការពារអធិបតេយ្យជាតិ ផ្សព្វផ្សាយសមិទ្ធផលរបស់រាជរដ្ឋាភិបាល និងកសាងរូបភាពវិជ្ជមាននិងលើកកម្ពស់កិត្យានុភាពរបស់កម្ពុជាទាំងក្នុងស្រុកនិងលើឆាកអន្តរជាតិ។

ជាមួយគ្នានេះ គ.ស.ព.ស. ត្រូវមានភារកិច្ច ជំរុញប្រសិទ្ធភាពការងារឆ្លើយតបព័ត៌មានក្លែងក្លាយ តាមរយៈការរៀបចំយន្តការឆ្លើយតបឱ្យទាន់ពេលវេលាជាប្រព័ន្ធតួអង្គតែមួយ និងបង្កើនសមត្ថភាពយុទ្ធសាស្ត្របែបឌីជីថល ផ្តួចផ្តើមគំនិតលើការផលិតខ្លឹមសារគ្រប់ប្រភេទសម្រាប់ពង្រឹងសាធារណមតិ សហការជាមួយបណ្តាញផ្សព្វផ្សាយដើម្បីចែករំលែកខ្លឹមសារនិងផ្សព្វផ្សាយបន្ត ធ្វើរបាយការណ៍ស្តីពីសកម្មភាពការងាររបស់ អ.ស.ព.ស. ជូនប្រមុខរាជរដ្ឋាភិបាល និងអនុវត្តភារកិច្ចផ្សេងៗទៀតតាមការប្រគល់ពីប្រមុខរាជរដ្ឋាភិបាល។

តាមអនុក្រឹត្យ គ.ស.ព.ស. អាចអញ្ជើញអ្នកនាំពាក្យក្រសួង ស្ថាប័ន និងអ្នកនាំពាក្យរដ្ឋបាលរាជធានីខេត្ត ចូលរួមពិគ្រោះយោបល់ និងបំភ្លឺរាល់បញ្ហាទាំងឡាយដែលពាក់ព័ន្ធនឹងក្របខណ្ឌការងាររបស់ខ្លួន និងការងារចាំបាច់នានាដែលត្រូវទទួលអនុវត្ត។

គ.ស.ព.ស. មានលេខាធិការដ្ឋានមួយជាសេនាធិការសម្រាប់ដំណើរការងារប្រចាំថ្ងៃដែលមានទីតាំងនៅទីស្តីការគណៈរដ្ឋមន្ត្រី ដោយគ.ស.ព.ស. មានប្រភពធនធានផ្តត់ផ្គង់ដោយថវិកាជាតិជាកញ្ចប់ថវិកាដោយឡែក នៅក្នុងក្របខណ្ឌថវិកាប្រចាំឆ្នាំរបស់ទីស្តីការគណៈរដ្ឋមន្ត្រី៕